LEERDERONTWIKKELING BY HOËRSKOOL CENTURION

Hier by Hoërskool Centurion verstaan ons dat leerders nie net ‘n graad 12-sertifikaat nodig het om die lewe buite die skool aan te durf nie. Hulle is deel van ‘n massa wat by universiteteite en ander tersiêre instansies aansoek doen. Baie van hierdie instansies is gedeeltelik of voltyds met afstandsonderrig besig. Ons kinders se wêreld is soveel anders as tien jaar terug se matrikulante s’n. 

Daarom het ons die behoefte gesien om ons leerders toe te rus om aanpasbaar en kreatief in hierdie veranderende wêreld te wees. Ons het ‘n unieke program vir elke graadgroep. Ons maak gebruik van ‘n eksterne organisasie “School of Leadership Africa” wat ons leerders by die skool besoek.  

Die program lyk soos volg: 

• Graad 8: Posisie – Waar is ek en waarheen wil ek gaan? 
• Graad 9: Toestemming – Gee jouself toestemming om nuwe goed te probeer. Maak jouself vas aan ‘n taak. “As ek begin, maak ek klaar.” 
• Graad 10: Produksie – Die saad is in graad 8 en 9 geplant. In graad 10 moet daar nou vrug wees. Daar is nuwe vakke vir graad 10 gekies. Die leerder verstaan hom/haarself nou ‘n bietjie beter. Nou kyk ons waar klein verstellings gemaak moet word. Waarmee is ek tevrede en waar moet ek aanpas? 
• Graad 11: Ontwikkeling van mense – Die groep beweeg nou in ‘n posisie van leierskap in. Hulle voorbeeld word raakgesien. Is ek tevrede met die voorbeeld wat ek stel? Is ek tevrede met hoe ek myself lei? 
• Graad 12: Toppunt – Hoe sluit ek my graad 12-jaar goed af? Waar moet ek dankie sê en waar moet ek om verskoning vra? Wat het ek geword? Hoe vorm ek wie ek is en hoe pas ek aan? Omdat ek ouer is en myself beter ken, kan ek makliker by uitdagings aanpas. 

Ons doen ook spesiaal moeite met ons graad 8- en graad 10-leerders deur hulle op ‘n kamp te vat. Ons graad 8-kamp fokus op ‘n nuwe begin. Wie is ek en waarheen is ek op pad? Die leerders word ook aan ons skool se unieke kultuur en die waardes wat hierdie kultuur dryf, bekendgestel. Groepskohesie is van kardinale belang, so die leerders spandeer ook baie tyd om mekaar, maar ook hulle graad 12-leiers beter te leer ken. Hierdie verhouding speel ‘n belangrike rol in die vaslegging van die Woerie-kultuur. 

Op die graad 10-kamp word die leerders as toekomstige leiers in die skool voorberei. Daar word gefokus op persoonlike ontwikkeling, waar moet ek aanpassings maak in my pad, groepskohesie, wat die groep se unieke karakter is en wat hulle vir die skool na matriek agterlaat. 

Daar is ook ‘n spesiale fokus op ons VLR en graad 12-leerlingraad. Emosionele intelligensie, konflikhantering, leierskap en goeie bestuur is van die onderwerpe waarop ons fokus. Ons sportkapteine word aan dieselfde opleiding onderwerp. 

Soos u kan sien, doen ons spesiale moeite om u kind by Hoërskool Centurion te akkommodeer. U sal nie ‘n fout maak deur u kind by ons in te skryf nie.